Hnangamnak Taktak

CIM Zarhpi Ni Caan Hmannak (October 24, 2010)

Caan tlaitu: Ngun Cer Chin 

Thawngtha chimtu: Sayama Elly Mang

Bawi Khrih ah nu le pa, u le nau hna nan umnak hmun cio ah a nungmi, kan biak Pathian nih a rak in um pi cio hna lai i lamtha a rak in hmuhsak cio hna lai tiah ruahchannak kan ngei. CIM chungtel thar vialte lunglawm in kan in don hna. Nihin zong ah thawngtha i hrawm ti nak caan tha a kan pek caah a min thiang thangthat ti hna u sih, kan thilrit vialte amah sin ah chia hna u sih law, thawngtha in thazaang thar la ti than hna u sih tiah kan in sawm hna.

“Nan ka auh ah cun ka leh hna lai i a nganmi le a thukmi thil nan hngalh bal lomi thil hna kha kan chimh hna lai” a ti (Jeremiah 33:3).

Thlacam cahnak

• Kan ram ah daihnak, dinnak le iruannak a um nakhnga thlacam ti hna u sih.
• A ra lai mi November ithimnak nih thatnak lam a panhmi thlennak a chuah pi nakhnga zong thlacam ti rih hna u sih.

Nihin thawngtha a kan chimtu hi Sayama Elly Mang a si. MIT ah lecturer a tuan mi a si i a tu hi Philippines Christian University/Union Theologial Seminary ah Ph.D a tuah lio a si. A cung ah lunglomhnak tam pi kan ngei.

HNANGAMNAK TAKTAK

Bible cangthim: Thawngtha Johan 14:27 “Daihnak kan chiahtak hna, keimah daihnak cu kan pek hna. Vawlei nih an pek hna bantukin kan pe hna lo. Lungrethei le vansang au in um hlah u: nan thin zong phang hlah u.”

Thinlung hnangamnak hi Nihin minung nih kan kawl bikmi pakhat ah ai tel ve. Si nain thinlung chung daihnak taktak hmuh a har. kan vawlei ah daihnak, hna ngamnak timi cu hmuhhar thil ah a cang cang. Pathian nih a kan hlanh mi nundamnak caan tawite chungah zeitindah hnangam tein kan nun khawh ve lai? Cucu kan Bible chungah Kan Bawipa Zisu nih a kan kamhtak mi a bia kha zohtthan in hnangam nak taktak kan tinco ve khawh nak lai kan sawm hna.

Vawlei nih pek mi hnangamnak: Minung nih kanduhmi kan hawl tikah dongh ni a ngei kho lo. Kan i zaa cang ti a har ngai. Lungtlin khawh a har. A thiammi nih anmahnak athiam deuh mi an hmuh tik hnaah thiamchin an duh. A rum mi nih anmah nak a ngei deuh mi an hmuh tik hna ah ngeih duhmi a tam chinchin. Muidawh nih an mahnak ai dawh deuh mi an hmuh hna tikah an i lung si kho tilo. Thiam duhmi, ngeih duh mi a dongh khawh ti lo caah, thinlung hna a hnawk i a ba. Cucaah vawlei nih a chuah pimi lawng ah kan lungthin kan bunh ahcun kan nunnak thinlungchungah daihnak, hnangamnak a tlau ko lai.

Mifim hna nih ruahnak cheuhmi:

1. Midang kongkau ah i thlak tuk hlah. Mi tampi cu midang kongkau ah kan vai thlak lengmang nak nih harnak le lung retheihnak a chuah ter. Keimah ruahning le tuak ning ahman bik timi ruangah a si. Pathian nih phundang te cio in a kan ser caah kan khua ruah dan ai khat kho dih hna lai lo. Cucaah midang kongah buai hlah law, na hna a ngamlai, na thin lung a dai ko lai.
2. Ngaithiam law philhkhawh i zuam: Lungdaihnak dingah a ttha tuk mi a si, nain mitampi caah a har fawn. A dingmi Pathian tu nih abia ceih te koseh. Ngaithiam, philh law hmai ah kal ko.
3. Thangtthat duh tuk hlah: Lungtak lo kaa lawng tthangthat a tamnak vulei ahhin nangmah bantuk in a thi kho vemi minung thangtthat cu duh tuk ding a si lo. Na rian tu kha felfai tein ttuan law a tangmi cu Bawipa ah khan chia dih ko.
4. Hnahchuahnak nei hlah: Hnahchuahnak nih zeitluk indah mi thinlung hna a hnawh. Hnah chuahnak nih zei thilttha hmanh a chuah pi lo, sivangh nak tu mi a pe.
5. Na thlen khawh lomi ruangah lungrawk hlah: Kan thil ti khawhnak pin leiah a cangmi, kan thlen khawh lomi tampi an um. A tthatnak lei in ruah i zuam.
6. Na ttuan khawhlo leng tiang rian i khinh hlah: Na tha zaang i dap law, tam tuk in rian i khinh hlah. Kingdai ah lung daitein i dinh nak caan zong i chiah pah.
7. Cawng awr in um hlah: Tuah ding thil kha katuah ah maw a ttha hnga tuahlo ahhme tiah lung i thlek kholoin umnak nih ngeihchihnak a chuah pi tawn. Na palh tikah tthut ko i lung retheih naknih zeihmanh a chuah pi fawn lo. Cawngawr lo in a thar in thok tthan ko.

A cunglei ruahnak cheuhnak hi an ttha ngai. Zapi ko nih cun kan zulhkhawh tawn lo caah hna ngamnak kan ngei kho tawn lo. Cucaah a kandaw i kan caah a thimi, a tthawngmi Bawipa Bia tu ah i hngetchan kan herh.

Bible nih a kan cawnpiakning

Thawngttha Johan 14:27 “Daihnak kan chiahtak hna, keimah daihnak cu kan pek hna. Vawlei nih an pek hna bantukin kan pe hna lo. Lungrethei le vansang au in um hlah u: nan thin zong phang hlah u” tiah a zultu hna Bia a kamh mihna hi thawngttha pa 4 nak ah a voikhatnak a si. Biakam hlun chung ahcun “Daihnak um ko seh” ticu an i tthen laiah an hman tawn mi a si nain Bawipa Zisuh nih Daihnak kan chiah tak hna a ti hna tikah hin i tthen lai thlahnak menmen bia lawng a chim lo. A kamh mi hna cu ngahttah bantuk in anmah lawng kaltak lo ding le Amah Daihnak nih umpi ding kha asi. Cu daihnak cu vawlei nih pekmi, a lo kho zau mi daihnak le himnak ai tel lomi (tahchunnak ah, Jer. 6:14 Ka mi hna cu, an hma kha an menpiak ko hna, Sihmanhsehlaw a leng parpavuan lawng in a si; ‘A dam ko lai,’ an ti, zeidah a dam ko lai? Zeihmanh a dam lai lo) kamhmi bia bantuk a si lo. Bawipa Jesuh a nunnak a sining chungah a ummi dawtnak le lomhnak he a hung chuakmi daihnak a si.

Bawi Zisuh nih a zultu sinah a rak kamhmi hna cu amah a zumtu vialte caah a si. Hi daihnak ngeih ruangah harnak kan tong lai lo ti a si lo. Hrial khawh lomi hi vulei nih a chuah pimi harnak ton bu in cu daihnak cu ngeih khawh a si. Pumsa nih zawtfah nak a tuar buin cu daihnak cu ngeih khawh a si. Hlawtmi si lio ah cu daihnak nih mi a hnemh. Harnak ton tikah cu daihnak nih thinlung a daih ter. Bawipa nih a kan umpi ko, a kan kal tak lo timi nih ttihnak a loh ter. Cu Bawipa nih kannunnak cu a tu le hmai lei tiang zong a uk. Cu ban tuk daihnak cu zeihmanh nih, le a ho hmanh nih a kan pe kho lo, Bawipa Zisuh lawng nih a kan pek khawh. Amah a zum mi poh a pek hna. Sinain kanmah nih ngeih ve duh nak thinlung kan ngeih lawng ah amah sin in kan hmuh lai. Harnak kan ton tikah kan ruahchannak cu kanmah le kanmah cung lawngah kan chiah ding a si lo. Lung rethei le van sangau in um hlah uh a kan ti tu, nan thin zong phang awn hlah uh a kan titu, Daihnak a kan pe tu Bawipa Zisuh ai nunpi mi hna lawng nih HNANGAMNAK TAKTAK cu ngeih khawh a si. Kan nih Bawipa Zisuh zumtu vialte zong, cu DAIHNAK le HNANGAMNAK TAKTAK kan ngeih dih cio khawh nak hnga a dawtnak hri in kan ttem seh law thlauchuah kan pe hram ko seh. A Men!

Lawmhnak tampi he,

Elly Mang