CIM Pathian Ni Caanhmannak (March 4, 2012)
Caanhmannak Hruaitu : Danny Bawi Thianhlun
Thawngtha Chimtu : Pastor John Za Thleng
Tuchun ni tiang dawtnak in a kan umpi i thluachuahnak he lam a kan hruaitu kan biakmi kan Pathian a min thangtthat si ko seh. Pathian bia cu zumtu kan caah kan ṭhawnnak rawl (I Peter 2:2) a si. Cu rawl cu ngakchia caah hnuuk (1Peter 2:2), rawlttam mi caah chang (Mat. 4:4), patling caah sa (Heb. 5:11-14) a si tiah a ti. Pathian bia hrawm ṭi khawhnak caanttha a kan petu kan Biakmi Pathian cungah lawmhnak biachim buin le pumpak kan nunnak i ap buin kan caan hram thawk hna usih.
Pathian Bia Thiang Relnak
Isaiah 55:10-11 “Ka bia cu van in a rung tlami ruah le hawhra bantuk a si lai. Ruah le hawhra nih cun, van ah kir tthan ti loin, vawlei kha an hnawnter I thlaici kha an khohter i an tthanter i thlaici tuhtu kha thlaici an pek hna i rawl eitu kha rawl an pek hna. Cu bantuk cu ka kaa in a chuakmi bia cu a si ve lai – ka sinah a lawngin a ra kir tthan lai lo, tuah seh tiah ka fialmi kha a tlolh lai lo i ka thlahhnawh chanmi thil ah khan a tlam a tling lai.”
Thlacam Cahnak
1. Atulio vawlei khuaza ummi kan Chin miphun hna chungin thihnak, harsat lungretheihnak a ingtuarmi kan miphun unau hna caah thlacam bawm hna usih.
2. Kawlram cozah le kawlram chung ummi miphun viatel caah thlacamnak ngei hna usih. Pathian dawtnak an theih khawhnak lai zong thlacam piak chih hna usih.
3. CIM Pathian rianttuannak caah thlacamnak ngei hna usih. Pehzulh in mipi caah thawngttha bia a thlah khawh zungzal nak lai Bawipa sin ah thluachuahnak hal piak hna usih. Tawlreltu upa hna le chungtel hna ca zongah thlacamnak in bawm zungzal hna usih.
4. Tuni thawngttha a kan chimtu Pastor John Za Thleng le a Khrihfabu (Chin Evangelical Baptist Church, Indianapolis, IN) caah thlacam piak hna usih.
Thawngṭha Chimtu Tuanbia Tawi
Nihin kan sinah thawngthabia a kan chimtu hi Thantlang khuasami Pu Tin Hre (Hriang Khan) le Pi Hreng Cia (Thantlang) hna i an fapa asi. 2007 ah Yangon khua ummi Missionary Training School in B.Th a dih hnu ah 2007-2009 tiang Thantlang Johnson Memorial Baptist Church ah Church School le Mino hruaitu dirhmun in i pumpeknak le rianṭuannak a rak ngei. February 12, 2012 thawk in Chin Evangelical Baptist Church (Indianapolis, IN) ah caantling Asst. Pastor dirhmun in rianṭuan hram a thawk kaa te asi. Mino tlangval asi nain Pathian le miphun caah i pumpeknak nun a ngeimi asi. CIM ah thawngttha chim kan sawmnak lung lawm te’n a kan cohlan caah a cungah lunglomhnak tampi kan ngei i Pathian tu nih a rianttannak ah thluachuahnak pe chin ko seh.
Thawngṭha Chimnak
Pastor John Za Thleng
“Angan Adammi Khrihfabu”
Hebru 4:12 "Pathian bia cu a nung i a ṭhawng. Kap hnih har vainam nakin a haar deuh. Hlang lak in a cheu khawh, nunnak le thlarau an i tonnak tiang, hliahcang le thlik an i tonnak tiang a cheu khawh. Minung lungthin duhnak le ruahnak vialte kha a hngalh dih."
Ahmasa bik ah Bawipa min thangṭhat si ko seh! Cun caan a ka thiahtu kan u le kan pa le hna ,Nan cungah lunglomhnak tampi ka ngei.Careltu nan dihlak cungah lawmhnak chimcawk lo kan ngei, CIM hi kan Pathian nih thluachuahnak a pek i adirkamh,kan miphun lakah, hi bantuk in thawngṭhabia chimnak nan tuahmi cu ka lungtling tuk.tha zaang ka ngah tuk kei zong.Nan rianṭuannak ah Pathian nih thluachuah in pe ko hna seh!
“ Angan a dammi zumtu ” kan si khawhnak hnga.
1. Pumpak dam hmasa aherh.
Vawleicung ah hin dam hi abiapi bik ko, zeitluk hmanh in kan va rum zongah, kan va fim ko hmanh ah,minthatnak kan hmuh zong ah,kan vai I dawhtuk I kan min athan len ko hmanh ah, kan ngan adam lo ahcun, kha vialte kha pakpa lawnglawng te an si. Dam lo cang ah cun vawlei thil le ri nih lawmhnak a kan pe kho loh.Cucaah kan taksa, kan thlarau,kan thinlung apathum te in kan dam bak aherh.Kan chungkhar, kan khrihfabu le kan miphun zong angan adam mi bak asi aherh.
Angan adammi ram le miphun,adammi khrihfabuu,a dammi chungkhar si kan duh taktak ah cun angan adammi zumtu pumpak kan si hmasa aherh. Jesuh cawnpiak mi ah “Angan adammi thingkung nih theitha an tlai I adam lomi thingkung nih theichia atlai,” Mathai 7 : 17 ah ati, Kan khrihfabuu hi adammi khrihfa bu kan si khawhnak ding ahcun members dihlak le hruaitu vialte,pumpak nangmah bak kha khrih ah kan dam bak aherh..Na thlarau damlawng siloh,na thinlung le na ruahnak hrimhrim hi adam mi / adikmi khuaruahnak, ahman mi lungthin le khrih ah adam mi na si aherh.Laimi barawhzat hitluk in buu kan kuainak le kan I thennak, kan I fonhtonh khawh lonak,Chungkhar a buainak,sualsal kan tannak, aruang cu kan dam taktak lo caah asi.
Na va pa nunnak, na chungkhar nunnak, na khrihfabu le na ram adam khawhnak hnga,nangmah kha taksa,thinlung le thlarau a dammi na si aherh. Nangmah kha Midang caah samaria mitha na si hmasa aherh.
2. Pathian bia ah na hram na bunh a herh.
Minung nunnak ah asi kho lomi thil 3 aum.1 Rawl 2. Ti (dinmi) 3. Thaw hna an si.Hivial te hi kan pumnih a herh mi lawng te asi..Asinain damnak caah ei mi rawl aum I hrialding mi rawl a um, Din dingmi ti a um I dinlo ding mi ti a um, Dawp mi thli phun a um I dawp lo ding thli zong a um. Kan damnak ah kan ti le kan rawl ahmanmi si aherh.Cun kan eining zong hi abiapi tuk. Eipoah hi damnak asi loh, aherhmi le ahmanmi ti le rawl ei tu hi damnak asi.
Nihin khrihfami kan nunnak ah Ka piangthar ee kan ti sek ko nain, mi hmai ah tette kan I khansek len ko nain, Champing le Crusade zong kan I kai sek ko nain,,zeiruang ah dah kan tluk lengmang tiah cun pathian bia ah hram buh loin minung tu ah hram kan bunh theo caah asi. Phungdang cun camping le crusade ah heih kan hram kan bunh sual cu.
Tuah hmanh ! Kum 100 atling cangmi khrihfa nih Zeiruang ah dah 1/10 kong,pumhkhomh kong, thlacam kong ah fialpeng kan hauh rih,sawmpeng le lempeng kan hauh rih, Nihin ni Laimi khrihfa kan nunning hi I lem le I forhpeng kan hau..nangmah theutheu tiah I lem le I soipeng kan hau ko rih hih, Aruang cu, Pathian bia ah na nunnak hram na bunh taktak locaah asi. Pathian bia ah/ Pathian ah nunnak ai phummi le ai pehmi hna cu lemsoi an hauti loh.
Mithiang Paul cu Pathian ah azumhnak Hram abuh caah, Rome 8:35-39 Khrih dawtnak he cun zeihmanh nih a kan then kho lai loh,,atinak khi asi.Pathian bia ah kan zumhnak le kan nunnak hram kan bunh lo caah mitkuh vuilohnak, thilsuk ka hau ti luklak nak,nau a dam huaha loh, tiluklak nak, Xmas lai si le, ka batuk le tuzaan cu ti luklak nak nih hme Pathian he akan hlatter ko cu.Phungchim tu ka uar loh tiluklaknak (Phungchimtu athiam le thiam lo ti I buaituk hna hi cu,thlarau lei ah thazaang der bia tu asi ka ti kei cu..) culuklak nih hme Pathian he akan hlat bak ko cu. Phisin na duh ah cun kaa thongkhat hmanh in nai phisin khawh ko lai,nain na tenh ah cun tenh khawh asi thiam ko lai khakha.
Sider thingkung kung hi kan Bible ah voi 75 kan hmuh khawh.Ahme mi hi Pe 82, acaang deuh mi hi pe 130 tiang asang kho..sider thing cu Meter 2200 tluk asang mi Lebanone tlang ah a kheu I Cunglei ah pe khat akai ah cun tanglei ah pekhat apil ve..Ahram hi ti aphak hlantiang in ahram hi apilter.Thlichia le totho le faruahthawh nih an den deuhdeuh, afek deuhdeuh, atha deuhdeuh… afek deuhdeuh..tiah a kan chimh tawn.
Afek I atolmi thingkung asi caah siangpahrang inntamhnak ah hman asi.Kan nih vialte zong van tamhtu sider thingkung kan si ve,sider thingkung asimi nangmah le keimah nih kan hram asimi Pathian bia (tinung) ah kan vai I peh I kan vai I buah asi ah cun,Zeibantuk thlichia le tilet hmanh hi kan tei khawh ko lai,Muvanlai nih Thlichia cu a thawnnak ah ai lak bantuk in kan nih zong pathian bia thiang ah kan zumhnak hi fekte in ahram kan bunh ah cun kan fehnak le a kan thawntertu thlichia men ah an cang ko lai.
Hebru 4:12 "Pathian bia cu a nung i a ṭhawng. Kap hnih har vainam nakin a haar deuh. Hlang lak in a cheu khawh, nunnak le thlarau an i tonnak tiang, hliahcang le thlik an i tonnak tiang a cheu khawh. Minung lungthin duhnak le ruahnak vialte kha a hngalh dih." Kan nunnak le kan zumhnak hi Pathian bia ah ahram bunh aherh,Kan damnak caah ti le rawl, (bible le thlacamnak) hna hi nichair te ei piak peng aherh,Pathian ah I ap peng aherh,cunih cun kan pumpak nun a dam ter lai I,kan mah in kan chungkhar a dam ter lai I kan khrihfabu le kan miphun tiang nih damnak kan hmu lai.
