CIM Zarhpini Caanhmannak (April 01, 2012)

Palm Sunday Caan hmannak (1st April, 2012)

Caan tlaitu: Siang Dun

Phung chimtu: Rev. Van Thawng Lian

Palm Sunday damnak he a kan phaktertu Pathian thangtthat hnausih. Nihin cu Jesuh Sunglawi ngai in Jerusalem ah a rak lut ni camtuak a si. Mipinih sunglawi taktak in rak ton bantuk in Kan thinlung innka hong hnausihlaw, Pathian cu kan thinlung dawne (bottom heart) in dong ve hnausih. Thawngttha a kan chimtu Rev. Van Thawng Lian cung ah lawmhnak chim hna usih. Rev. Van Thawng Lian hi thawngttha chim ah cun ready a si kho peng. Upat a um hringhran. A kut ah caan kan pek cang.

Thawngttha Chimnak

Raukhmuh Sawmnak
(Rev. Van Thawng Lian)

“Jesuh cu Bethani khua i Simon, thinghmuipa Inn ah khan rawl a hrawng. Rawl an ei lioah khan minu pakhat a rung lut i lungrang thawl khat tein Zihmui a tha bik phun kha a rak i put. Thawl kha a khuai i Zihmui cu Jesuh lu ah khan a bungh . . . Tangka 300 ah zuar i misifak pek ah a tha deuh lo maw? An ti i minu cu fak piin an mawhchiat . . . Jesuh nih cun “ngol ko u . . . ka ca i a tuahmi hi aa dawhmi le a thami thil a si, ka pum i zihmui a ka toih cu vui awk ca i a hlankan in a rak ka timh chung pei a si cu. Hihi philh hlah u; Vawlei cung khuazakip i thawngtha an chimnak paoh ah hi nu nih a tuahmi hi amah philh lonak caah an chim camcin lai,” tiah a ti hna (Mark 14:3-9; Cf. Matt. 26:6-13, John 12:1-8).

Biahmaithi: Jesuh Lu ah Zihmui a toihtu minu kong hi an chim camcin lai tiah Jesuh nih a ti ko nain atubantuk Bawipa thawhthan lai hrawng hmanh ahhin mah Nu kong hi chim a tlawm ngaimi a si. Cun, hika i Inn ngeitupa, Simon thinghmuipa kong hi Bible hmun dang ah hmuh a si lo, thinghmui zawtnak a ngeimi nihcun midang rawlhrawn sawm awk a that lo caah zeitik caan ahdek, khuazei kaahdek Jesuh nih a zawtnak in a rak damtermi si dawh a si. Johan nih a tialning ahcun Simon nih rawlhrawn a sawmmi hna lakah hin thihnak in a thawhtermi Lazaruh le a farle pahnih; Martha le Mary zong an i tel ve. Martha le Mary nihhin an rak sitawnning bantuk khan (Luke 10:38-42) Martha nihcun Zanriah a serpiak hna (John 12;2), i Mary nihcun thiltha deuhmi aa thim i, timhcia tein a rak i kenmi Zihmui dur kha a khuai i Jesuh ruakvui ding timhtuahnak caah Jesuh Lu ah a bungh i a sam in a hnawh. Kannih tah Martha rian maw kan tuan Mary rian dah? Hi Bible nihhin tukum Bawipa thawhthan kan hmannak ah cawnpiak a kan duhmi hna cu:

1) Timhlamhnak kan herh:Mary nih hin Jesuh Lu cung i Zihmui toih dingah tlacop si loin timhcia tein Zihmui hi Inn in a rak i put, Simon Inn a phak hnu ah va chuakthan in a cawkmi a si lo, timhcia tein a rak i ken. Tuchun Laimi kan Pathian biakning le kan nunning cu timhcia kan si tawn lo, kan thilpuan hrukaih in siseh, thawhlawm kan pek ning in siseh, hla kan sak tikah Inn ah ka cawng manh lo le kan timi te hna nih khin kan i timhlamh lo zia an langhter. Kan i timlam lo ti a sullam cu kan i biatak lo tinak khi a si ko. Cucaah tuchun Laimi nihcun zeithil kan tuahnak paoh ah, vawlei lei he Biaknak lei he, timhcia te i kan tuah lawngah tlam a tling ding kan si. Zankhat mui tonnak i, i thit-umh, zan/voikhat lungthawhnak lawng i tehte khan le Bible sianginn kai i, i thawh le Pathian rian i, i pumpek tbk hin cun kan si kho ti lo. Khatleikam i chim ahcun timhcia timi cu tinhmi, phak duhmi, tlinh duhmi ngeih khi a si ko. Nupithit aa timmi tlangval pa nih aa i tinhmi cu Nupi thit khawh kha a si ko. Cucaah tuchun Laimi nih Mary bantuk hin zeithil kan tuahnak paoh ah, a hleiin thlarau lei ah timhlamh cia kan si a herh. “Bawipa cu a rung tum than lai, timh cia in um tuah u” (ZBC - 165). Zeicahtiah kan nunnak hna cu thladem bantuk (Job 8:9, Sam 102:11), thaw/tikhu bantuk (Sam. 39:5, Jame 4:14), ram bantuk lawng a si (1Pet. 1:24) caah kan thlarau caah timhcia kan si a herh. Mirang nih, “Ever ready never sorry,” an ti a si lo maw? Naa ready maw?

2) A tha bik kan pek herh: Mary nih Jesuh a toinhmi Zihmui man hi Lai Bible nihcun tangka 300 man tiah a ti, Mirang Bible nihcun denarii/denarius timi biafang a hman i, Jesuh chan lio i Denarii fangkhat cu minung pakhat nikhat hlawhmi a si (Matt. 20:2, 9-10) caah Danerii 300 cu minung pakhat i a kumkhat hlawh nak in a tam deuh ti khawh a si (US tuakning in Zarhkhat Ni 5, suimilam 40). Hi vialte phaisa hi dawtnak le pek duhnak thinlung taktak ngeih lo ahcun a si kho lomi a si. Mary nihcun sian lomi a ngei lo. Micheu nihcun hi bantuk Zihmui hi Nupi thit le Va ngeihnak caah an khonmi a si an ti. Mary caah cun vawlei i pasal/va va ton lo zong a poi ah a chia lo, a ngeihmi lak i a thabik, Va ngeihnak dingah aa chiahmi Jesuh pek kha vanthat ah a ruah. Zeicahtiah kanmah pumpak caah a man a sunglawi lomi cu Bawipa ca zongah a sunglawi ve lo. Kan caah a man a fak lomi thil cu Bawipa ca zongah a man an fak ve lo. “Amah cu a tha bik kan ngeihmi vialte, kan lungthin dihlak le dawtnak he pe usih (ZBC –394). Nuhmeinu phaisa pia 2 kha midang caahcun zei a si men lai lo nain amah, nuhmeinu caah cun a man a sunlawi tuk caah Bawipa nih a tambik le a sunglawi bik ah a cohlan piak. Kannih Bawipa kan pekmi le midang thil kan thenhmi hna cu, kan herh lemlomi, kan duh lem lomi, kan i tet deuhmi le kan i tlak lem lomi khi an si theu tawn caah Bawipa ca zongah an sunglawi ve tawn lo.

3) Zihmui thawl khuai kan herh: Zihmui thawl khat, Zureu thawl khat kan cawk kan ti tikah a thawl khi kan cawk chanmi a si bal lo, a chung thil khi a si deuh bantuk in Mary nih Jesuh a pek chanmi le a toih hnawh chanmi cu a thawl kha a si lo, a chung i a ummi Zihmui kha a si. Cu Zihmui cu Jesuh cungah a luan i a rim a chuah khawhnak hnga a thawl kha khuai a herh, a khuai i a hlawnh ko lai. A lio a heu tuk sual lai tiah a dor tete i tla ding in a vihmi le a pemhmi a si lo, a bungh i bungh i a dihlak i a tlak khawknak hnga a khuai bak in a khuai, amah caah i nganh le i chiah a tim lo, adihlak in Bawipa caah a sian. Hihi keimah pumpak zong nih tuah kaa harh bikmi a si i, midang zong nan si cio theu lai, Pathian kan pekchanhnak le kan thangthat tawnnak hi kan lenglei minung a kuai khawh tawn lo caah “kan aw cu Jacob aw, kan ban cu Isau ban” bantuk kan si tawn, kan chung le kan leng kan i dang zungzal. ZBC 35 nihcun nan Aw ngeih vialte in Bawipa thangthat u” a ti ko nain hla kan sak tikah kan aw mi dang theih lai phang bang dinte lawng in kan chuah. Baptist Pastor ka hawipa nih naite ah thawngtha a chimmi tlangpi cu, “A clean hand and a dirty Heart” tiah a tar i khua tampi a ka ruahter. Pathian nih kanmah Ta a si lomi kan chung (tlakum) ah a chiahmi (2Kor. 4:7) thawnnak cu kan minung sinak tlakum a kuai hlan lo cu a lang kho lai lo. Tuchun i thawngtha a tialtu pa, keimah Van T Lian, hrimhrim hi ka kuai a herh, cu lawng ahcun minih Jesuh rim a hmuinak an theih khawh lai, i Bawipa sunparnak a lang lai.

Biatlangkawmnak: Kum dang bantuk si loin tukum cu kan caah a thimi Jesuh ruakvuinak caah a tha bik kan ngeihmi le kan thinlung dihlak in timhlamh cia tein Amah cu pe hna usih law, kan nunnak ah Bawipa sunparnak a lang ko lai. Kan caah a sunglawimi lawng hi Bawipa ca zongah an sunglawi ve ti hi philh loin, kan caah zeizong vialte a siangtu Bawipa cu a thabik pe cio dingin kan sawm hna. Bawipa thluachuah nan cungah um ko seh, Amen.

A rian thiang ah

Van T Lian

Houston, TX

USA