Bawipa Sin Lawmhnak Chim cu kan Thawnnak a Si!

CIM Zarhpini Caan Hmannak

November 27, 2011

Caan tlaitu: Hrang Hlei (St. Paul, MN)

Thawngtha chimtu: Rev. Nguniap Mualcin

(Pastor, Springfield Chin Community Church, Springfield, MO)

Bible caangthim: Filipi 4:6-7

Kan Bawipa Jesuh Khrih min in nan kut kan tlaih hna! Nun damnak le thluachuah phun kip he lam a kan hruai i nihin amah thangthat kho ding le thawngtha i hrawm kho ding in caan sunglawi a kan petu kan Pathian a min thangthat si ko seh. Nan dihlak cung ah kan Bawipa sin in a ra mi van/vawlei thluachuah um ko seh. Cun, nan rian tuan nak le nan cawl canghnak cio ah nan lam tluang sehlaw, nan hlawh tling hram seh.

Cathiang vun rel hna usih:

"A zungzal in i lawm uh, a zungzal in thla cam uh. Zeibantuk thil nan ton hmenhah lung lawm in um uh. Khrih Jesuh chung i nan nunning ah hin hi ti hin nung hna seh tiah Pathian nih an duh hna" (1 Thessa. 5:16-18).

Kan dihlak thla cam hna usih:

Liangngannak he a khat mi le nifa kan nunnak ah thluachuah phun zakip he lam a kan hruaitu Bawipa, na min upatnak um ko seh. Nifa te kan nunnak ah na thluachuah a rel zia kan thiam nakhnga kan cawnpiak law, zeibantuk thil kan ton caan zong ah nangmah sin ah lawmhnak bia a chim kho mi zumtu pakhat cio kan si khawh nakhnga fimnak kan pe ko. Cun, nangmah duhnak tuah kha kan duhnak sangbik ah a chia kho mi kan si khawh zungzal nakhnga kan bawm ko. Cu ti cun, na thluachuah a rel zia kan thiam i midang kha na thluachuah a hrawm kho tu kan si nakhnga zong lam kan hruai ko. Khamhtu Jesuh Khrih min in thla kan cam. Amen.

Nihin thawngtha a kan chimtu hi Rev. Nguniap Mualcin a si. Amah hi Insein Bible sianginn ah ca a cawn dih hnu in Falam Bible sianginn (ZTC) ah cachim rian arak tuan bal mi a si. Cu lio ah cun keimah zong hi a siangngakchia pakhat karak si ve. Caan dang tampi lakah kan sin thawngtha chim kho ding in a kan tenhpiak khawh ca ah a cung ah kan i lawm. Pathian nih hmailei a rian tuan nak ah hmang chin sehlaw lam hruai chin ko seh. Thawngtha chim ding in Saya Iap sawm hna usih.

Bawipa Sin Lawmhnak Chim cu kan Thawnnak a Si!

Ka min cu Nguniap Mualcin ka si. Springfield Chin Community Church (Missouri State) ah Pastor a tuan lio mi ka si. CIM i caan ka hman lo nak hi kum 10 deng a si cang. Tutan Thanksgiving zerh theng te ah caan ka hmuh tikah ka lawmhnak a sang khun. Caan a ka petu nan cung le Pathian sin ah ka lawm. Tutan cu Thanksgiving caan he ai ton thiam pah ca ah Bawipa sin lawmhnak biachim i a thawnnak hmual hi kan dihlak hrawm ti ding ah sawm kan duh hna. Bible kan rel ta lai.

Filipi. 4: 6-7: Zei thil kong hmenh ah lungrethei in um hlah u. Thla nan camnak ah Bawipa cu nan herh mi kha hal u law nan hal tikah lunglawm tein hal zungzal u. Cun, Pathian daihnak, minung hngalhnak a lonhtu nih cun Krih Jesuh chung ah nan lungthin le nan ruahnak cu him tein a chiah lai.

Biadomhnak: Thanksgiving zerh he kan i ton khawh ca ah nihin kan dihlak i ruah ti usih ti ka duh mi cu Bawipa sin lawmhnak biachim cu kan thawnnak a si ti hi a si. Fa a ngei cang mi nu le pa hna: kan fale nih ka Nu, ka Pa "Ka lawm tuk" an van kan ti ah cun zeitluk in dah kan i lawmhnak a tlin. Vawlei cung mi hmenh cu tluk kan i lawmh ahcun, Bawipa sin lawmhnak bia kan chim tikah kan Bawipa zeitluk in dah aa lawmh lai ti hi holh in chim khawh a si lai lo. David Siangpahrang pa nih cun Pathian sin lawmhnak biachim cu thiltha a si a ti (Sam. 92:1). Pathian sin lawmhnak biachim bu in thla na cam ah cun na thlacam hmual a thawng deuh lai, zeicah tiah Bawipa cu zeizong vialte a kan petu a si ti kan i fian ca ah. Cu lawng si loin, kan thlacam a kan leh ca zong ah Bawipa sin ah kan i lawmh ding a si. A mah ah aa lawm mi nih cun zeitik hmenh ah van lei hoih in khua an ruat tawn. Bawipa sin i phunzai pah in lawmh bia chim khawh a si bal lo. A mah sin ah ngeihchiat bu in lawmhbia chim khawh zong a si fawn lo. Pathian sin aa lawm mi nih cun nifa an nunnak ah Bawipa thawnnak kha an langh ter zungzal. Cu thawnnak hna cu:

Bawipa sin lawmhnak biachim nih kan zumhnak a than ter

Pathian sin lawmhnak biachim mi le a thluachuah a thei peng mi cu mi ruahnak tha ah a ser hna. Zei thil poh a tha lei in a ruah zia an thiam. Cu ca ah a mah thluachuah philh loin thlacam peng ding cu kan rian biapi bik a si. Cu ca ah Paul nih, 1 Thes 5:17 ah thla cam zungzal u a kan ti. A peh rih mi cu, zei bantuk thil nan ton zong ah Pathian sin ah i lawm ko u a kan ti fawn. Lawmhnak biachim cu kan thlacam nak i a muru a si awk a si kha a fiang chin. A luancia caan i kan thlacam nak a kan leh mi nih hmailei kan zumhnak kha a thawn ter. A thluachuah kan hmuhmi cung i lawmhnak bia kan chim mi nih hmailei ah thluachuah tam chin kan hmuh lai ti zong ruahchannak thawnnak a kan pek. Goegre Muller cu harnak a tongmi cung ah lawmhnak bia a chim ti a si. Muller nih a ti mi cu, "harnak cu kan zumhnak ca ah kan rawl a si" a ti. Harnak zeitin dah a hmuh tiah cun, kan zumhnak a thawnter tu a si a ti.

Bawipa sin lawmhnak biachim nih Pumsa damnak a kan pek

Bawipa sin lawmhnak biachim cu damnak thawnnak a ngei. Phungthluk bia 17:22 ah kan hmuh mi cu, "lungthin lawmh cu si tha a si" a ti. Kan lungthin aa lawmh ahcun kan dam i si ei zong kan hau lem lo. America ah survey an tuah nak ah: Pathian sin ah aa lawm i Biakinn hman tein a kal mi cu Biakinn a kal bal lo mi nak in kum nga an chan a sau deuh an ti. An i lawm i an ngan a dam. Lawmhnak he thla a cam mi cu zei thil poh kha an theih thiam i an lungthin chung ah daihnak in an khat. Harnak an ton caan zong ah Bawipa khuakhan a si an ti i a ruahzia an thiam. Aa lawm mi hna nih lungretheihnak an ngei tuk lem bal lo. Daihnak in an tei peng. Bawipa sin aa lawm mi cu harnak an ton caan zong ah thazang thawnnak a thar in an la. Bawipa sin lawmhnak bia a chim mi cu: an lungretheihnak a lo, an lunglawmhnak a karh, an zumhnak le ruahchannak a thawn ter, lungput tha a neih ter hna, Pathian ca le midang ca ah pek duhnak le bawmh duhnak thinlung an ngei chin.

Bawipa sin lawmhnak biachim nih a mah bantuk si nak a kan zuamter

Zisuh Krih nun hi lawmhnak biachim khawhnak ca ah cun kan i zoh chunh ding tha bik a si ko rua ka ti. Mathai 11:25 ah, Pathian nih a duhnak a langh ter ca ah lawmhnak bia a chim. Pathian nih ei le din rawl a pek hna ca zong ah lawmhnak bia a chim. (Jh. 6:11). Bawipa zanriah an ei hmasat bik lio zong ah khan lawmhnak bia a chim. (Matt. 26:27). Cun, a thlacam a leh ca zong ah lawmhnak a chim (John11: 41). Zisuh bantuk in kan nih vialte zong lawmhnak kan chim peng ding a si. Zisuh nih a Pa sinah lawmhnak a chim bang in kan nih zong kan chim ve ding a si. Cu lawng si loin midang sin zong ah lawmhnak kan chim ding a si.

Nu le Pa sinah lawmhnak chim ding kan si: An kan dawtnak le zohkhenhnak ruang ah minung a si mi kan si ca ah kan nu le kan pa cu kan upat hna i lawmhnak kan chim ding cu leiba cham khawh lo mi bantuk in kan i ngeih. Nupi le Pasal sinah lawmhnak chim ding kan si: Pathian nih a kan pek mi nupi le pasal an si ca ah an chiat ah an that ah kan lawmh hna awk cu a si hrim hrim ko. Cu thil nih thil tha a chuah ter lai.

Innchungkhar nuam a chuah ter lai. Kan fale sinah lawmhnak kan chim ding a si fawn: Nu le pa tampi cu fale hi power silo le a cianni (a hrang lei in) in uk kan timh hna. Cu bantuk cu tih a nung ngai mi fale zohkhenhnak a si. Thiltha an tuahmi cung ah lawmhnak kan chimh peng ding hna a si. Kan hawi le sin zong ah lawmhnak kan chim ding a si.

Biadonghnak: Pathian sin lawmhnak bia chim nak i a tha bik mi cu: Na thinlung dihlak a mah pek kha a si ko. Bawipa sin aa lawm mi nih cun midang kha zumtu ah an ser tawn hna. Bawipa sin aa lawm mi cu Krihfabu ah daihnak le lungrualnak a chuahter tu an si. Thazaang der mi thazaang petu ding ca ah aa lawm mi cu kan herh zungzal hna. Nang tah Bawipa sinah lawmhnak bia na chim ve cang lai maw? CIM Thawngtha a hrawm mi kan dihlak ca ah Bawipa nih thluachuah kan pek piak ko seh. Amen!

Lawmhnak he,

Rev. Nguniap Mualcin

Springfield, MO