Zeiruang ah dah peem hi Bawipa nih a kan sianh?

Chin Internet Ministry Caan hmannak

(15th January 2012)

Zumtu nu le pa hna,
Caantha a kan pe tu kan Bawipa Pathian min ka thangtthat. Bawipa Dawtnak, Velngeihnak le Daihnak cu zumtu dihlak nan cung ah a thar in hmun tthan ko seh. CIM ah chungtel thar dihlak, lomhnak he kan in don hna. CIM cu zarhtin te Laiholh in thawngthabia i hrawmnak a si. www.chininternetministry.org zong ah leen khawh a si.

II Chanrelnak 7:14 "Ka minin kawhmi ka mi hna nih khan an lung an tthumh i thla an cam i ka hmai kha an kawl i an lam tthalo khan an i mer ahcun, van khin ka run theih lai i an sualnak cu ka ngaihthiam hna lai i an ram cu ka dam ter lai".

Thlacam ding sawmnak:

• Ram rianttuan hruaitu hna caah:- Bawipa nih a umpi hna i fimnak, dinnak le khuakhan thiamnak he rian an ttuan chin2 nak lai
• Ramchung ah zalonnak tling, tthanchonak le dinnak a karhnak lai
• Kan umnak Khrihfabu Pastor hna, Upa hna le chungttuan hna caah
• Thawngttha karhnak ding ah rammui ah rianttuantu hna caah
• US, Isreal le Iran cozah hna karlak ah hmuhthiamnak a chuah tthan nak lai thlacam nak in bawm cio hna u sih. ( Ral thawh cu a si kho ti lo).

Ngun Thawng Lian

Thawngthabia kan i hrawm hna hlan ah Daihnak thlarau hla ngai cio hna u sih.

Thawngthabia kan i ruah tti hna lai:-

Zei ruang ah dah peem hi Bawipa nih a kan sianh?

Atu lio Kawlram, Lairam ah remnak thawng kan theihmi nih zapi lung a hlauh ngai i hnabeiseinak thar an hung chuak tthan hna. Thongtla zong tampi an chuak i lomhnak mitthli a luangmi innchungkhar hna zong hmuh khawh an si hna. Kawlram, Lairam ah thlennak nganpi a chuak hrimhrim cang i daihnak a len cang lai caah tthanchonak lam zong a awng cang lai, Lairam thar sersiam a si cang lai tiah nu le pa tampi ngaihnak in an khat. Kawlram zalonnak a hmuhnak thok in, kum 63 chung tawh hrenhkanh mi innka on piak tthan zong a lo ngai tak. Cucu biahman hei si seh law, ramthar sersiam ding cu thok tthan colh a hauh lai caah 'zeitindah' 'how to' timi biahalnak hi a biapi tuk tiah ka ruah. Cu biahal lehnak lam pakhat cu:-
ramleng ah kan peem lengluang mi sullam theihfiannak nih a lehkhawh ve tiah ka ruah fawn. Cu cu, nihin ah ruah tti ding in kan sawm ve hna.

Milurelnak ttha tein hmuh khawh a si lo caah, upa tthenkhat hna ruahnak ah cun, Chin(Lai) dihlak hi 1.6 million (nuai 16 hrawng) sidawh in an chim. Cu chung ah, Lairam chung ah milu 450,000* hrawng um dawh a si i a dang poh hi, kawlrawn le ramdang chin ah an um ti nak asi. Ramchung um mi let 3 tluk ramleng ah peem/hrambunh a si ti khawh a si. Ram pakhatte kan nei ko nain, zeiruang ah dah mah vialte nih ram chuah taak a si i zeizong vialte cung ah nawlngeitu Pathian nih ramchuah taak cu a kan sianh ko hnga? tiah bia kaa hal tawn.A tu lio i ram sersiamnak ding ah cun, ramleeng ummi cu zeidah kan biapit nak cu a si ti zong ka ruat chih. Biahram von zoh tthan hna u sih law, ramleng i kan peem lengluang ah sullam cu zeidah a si i, cu nih cun zeitindah kan ram sersiamnak cu a bomh lai ti nak cu hitihin ka ruah.

1. Nun cawng ding in miphun dang hna sin ah Bawipa nih a kan thlah

Isreal pawl kha Pathian nawlngaih an duh khawhlo caah Pathian nih sal ah a taan ter hna kong Baibal nih a kan chimh. Sal an taannak hmun ah an lungkhon vialte hrem an i huah i an ziaza, an nuncan, an lungput, an thathut vialte remh/damh kha Bawipa nih a sianh hna. Kan nih zong ramdang i umhmun kan khuar lulh cio hi kan umnak ram hna ah hnangam ngai i umtthut le eidin ruah ah si loin, kan lungkhon, ziaza, lungput hna remh i nun cawn kha kan Bawipa nih a kan sianhmi cu a si ve.

Kan hmuh kan ton mi hna vialte sinin nun cawn kha Bawipa nih a kan fial mi a si. Tiluk/mirang pa kan ton tik ah, mah pa hi ka tei lai tiah zuamcawh si loin, mah pa sinin Bawipa nih zeidah a ka cawnter ti kha a biapi deuhmi a si. Kan hmuhton mi hna sin poh in nun cawn kha Bawipa nih a kan fialmi cu a si. A minung lawng si loin, an thiamnak/fimnak hna cawn zong kha Bawipa nih a kan fial. Chaw le va lawng kha kan kawl ah cun kan lam a dong lai i chimpit vansang in kan um te lai. Asinain, Nun kan cawn ah cun thlachuahnak hrampi Bawipa aa lawm lai i kan tuahmi kip ah khua aung kan pem lai.

2. Pathian tinhpiakmi kan theih khawhnak hnga caah

Pathian nih a fale vialte hi tinhpiakmi a kan neih piak cio. Cu a kan tinhpiakmi cu amah Pathian hrimhrim khi a si. Amah Pathian kan hmuh/ton kha a biapi bik. Bawipa kan ton hnu ah cun fimnak hrampi a si i thiangthlarau bomhnak thawng in zeizong vialte a si kho lo mi a um loh. Biahalnak cu: nan nunak ah naa tinhmi hi chawva le rumnak hna a si sual maw? asiloah, Bawipa hrimhrim kha si loin, thil dang deuhtu khi dah, Bawipa nih a kan tinhpiak mi a si rua tiah na ruah sual?

Bawipa kha naa tinhnak a si ko ah cun, zeitindah lam na kal lai i, zeidah na tuah dingmi cu a si lai ti kha lam an hruai ko lai. Cucaahcun, kan nunnak ah tinhnak sangbik kan neih mi cu amah kan Bawipa hrimhrim kha a si awk a si. Tuanbia nih a kan chimhmi cu, vuleicung ram tthawngbik US khi, khi hmun ah zalong tein Bawipa kan va biak lai tiah aa thawhmi hna nih an rak dirh mi a si ti a si. Mi hmasa hna nih an i tinhnak cu Bawipa hrimhrim a rak si tik ah, an rampi nih thlachuah a co i vuleicung mikip nih nihin ah cun kan bochan hna i kan fuh hna.

3. Kan peem nak ram hna caah thawngthabia mei a vaang tu

Mirang hna ram cu kan theih cio bang in, Khrifa si nak nunning le ziaza tampi an nunnak ah a taangmi a tampi rih nain, Khrih nih an nunnak ah hmunhma a neih ti lo caah Bawipa bochan nak in mah le mah an i bochan deuh cang i an biakinn hna cu an tthing duahmah cang ko. An zumhnak a uai dih cang mi hna zumhnak meifar vaan ding kha kan Bawipa nih a kan fialmi zong a si.

A dang zong tampi a um rih ko lai nain, a cung lei ah kan i ruahmi pa 3 hna hi ramleeng ah kan peemnak sullam a si ti kan fian a si ah cun, Bawipa kan cung ah aa lawm lai. Bawipa kan cung i aa lomh ah cun kan ram tiang nih damnak a hmuh lai. Bawipa thuk deuhdeuh kan theihtik ah, fimnak ah kan tthang i zei kan tuahnak poh ah thiamnak (skill) zong a tthang tawn. Cu bantuk in an sining Bawipa nih a sersiam mi hna cu Hruaitu ttha an si tawn. Cu bantuk hna nih miphun an kan hruai zong a herh i kan ram zong an sersiam khawh lai.

Lairam nih Bawipa sinin damnak co ve cang seh.

Careltu upatnak he,

Ngun Thawng Lian
http://www.chininternetministry.org/

*Lamber (numbers) pawl hi a dik lo deuh kho men. Biahram ka laaknak hi upa hna he biaruahnak le cabia ka hmuh khawh tawk chung in a si.