Minung Hi Rawl Lawnglawng In A Nung Lo

CIM Zarhpini Caan Hmannak

Caantlaitu …………………. Siang Dun

Phungchimtu ……………… Rev. Philip Hrengling

Zumtu hawidawt vialte hna,

Pathian dawtnak hi a ngan hringhran ko. Ni thar, caan thar le damnak kan hmu hna. Thawngttha CIM hmang in kan ihrawm kho hna. Hi vialte hi Pathian thawng lawngte an si. Nihin thawngttha a kan chimtu hi Rev. Philip Hengling a si. CIM ah Director in can saupi a kan ttuanpiaktu a si. A tu hi Chin Bethel Church (CBC), Maryland ah pastor a ttuan lio. Bawi Khrih min in dong hna usih. A kut ah can kan pek cang.

Cathiang rel ta usih!

“Minung hi rawl lawnglawng in a nung lo, sihmanhsehlaw Bawipa kaa in a chuakmi thil kip in a nung ti kha an hngalhter hna nakhnga, rawl ttam fahnak kha an inter hna i, manna in an cawm hna, mah cucu nanmah nih siseh nan pupa hna nih siseh nan rak hngal lo” (Deut 8:3).

Hika Bible caang hi CIM rak thawkka ah Motto caah rak thimmi a si. Kan motto a si zong hi kan philh cang men lai. Tleicia kan pa Rev. Dr. Sang Awr kha 2003 ah phungchim kan rak thiah i, hi tlangtar hi sermon a rak ttial bal. Midang nih kan sermon ka thei tuk lo. Kan nolh khawh lengmang lo hmanh ah motto hi cu khuacaan te tal ah sermon khawh izuam usihlaw a ttha tuk ko hnga. Atu cu a vikvak a ttha deuhmi mino nih CIM nan vun kan hruai i tlam a tling khunmi a lo. Nunter lawng hmanh siloin tthanchoter zong hi nan kut chungah a um ko hih! Fakpiin izuam ko uh.

Israelmi hna cu an co awk ram lei panh in an kal lioah, an umnak tthing Egypt ram kha an ngai i, an hlam tthan lengmang. A ruang cu rawlttam tihal kha an celh lo caah a si. Egypt ram ah khan cun kan duh tawkin kan ei kan ding ko an ti. Moses nih “Ti le rawl ruangah nan phun nan ciar i, Egyptram ah kir tthan nan duh a si lo maw? I cinken uh! Pathian nih zeitluk dah an zohkhenh hna, manna in zarhkhat chungah niruk chung an cawm hna, lung chungin ti a chuahter, van ah a zuangmi mimte an thlak hna; ni saupi chung nan hnipuan zong a ttet lo; ni 40 chung nan ke in nan kal ko nain nan ke zong a phing lo; I cinken rih uh! Pathian nih nan hmaiah a rak kal chung i, chun ah minmei in an hruai hna, zan ah ceunak an pek hna. Nannih nih cun rawl lawng kha nunnak ah nan ruah. Minung hi rawl lawnglawng in a nung lo; Pathian kaa in a chuakmi tu kha nunnak a si ti hngalhter an duh hna caah rawlttam harnak kha an inter hna a ti. Pathian nih rawl lawngin nunnak a si lo ti kha hmuhsak in a cawnpiak hna.

Hi nih hin a kan cawnpiakmi cu Pathian cu nun cawmtu a si; rawl petu a si, nun a himtertu a si; kan nunnak huhphengtu a si; kan i hruk aihmi hnipuan, kan din kan eimi tirawl, kan i dornak inn le lo a kan petu a si. Minung nih a herhmi caah van I a zuangmi vate (mimte) cungah nawl a pek, cun manna le ti zong a herhning in a chuahter. Pathian caah a si kho lomi thil a um lo. Kan rawl eimi hna zong hi Pathian a lawmhtertu thil an si. Minung diriamnak le nuamhnak ca lawng an si lo. Pathian kaa ah nunnak hrampi a um kha kan zum kho lo, a tuah ciami tirawl tu ah nunnak a um rua tiah kan zumh. Israelmi hna zong nih rawlttam tihal in an um tikah, nun man ngei lo ah an i ruah.

Hi kong he pehtlai in biahalnak a um khomi cu “Kan nun caah maw kan ei? kan ei caah maw kan nun? ti hi a si. Bialehnak hi pahnih a um kho ve. Kan nun caah kan ei timi le kan ei caah pei kan nun cu ti hi a si hnga. Kan ei hmasa i maw kan nun, nunnak kan ngeih hnuah dah kan ei? ti zong hi ruah a hau ve. Paul nih “Pathian pennak cu ei le din menmen hi a si lo, Thiang Thlarau pekmi dinnak le daihnak le lawmhnak tu hi a si deuh” (Rom 14:17 ) a ti. Cathiang nih a kan cawnpiak duhmi cu “Minung hi rawl lawnglawng in a nung lo”. Biadang in chim ahcun, taksa rawlttamnak le diriamnak nakin nunnak dang a sunglawi deuh ti khi a si. Pumsa nih a herhmi pinah nunnak dang a um rih. Cucaah Bawi Jesuh nih “Cucaah cun pei nan nunnak ca i nan herhmi rawl le ti kongah le nan pum ca i nan herhmi hnipuan kongah lung rethei awklokchong in va um hlah u kan ti hna cu. A ngaingai ti ahcun, nunnak hi rawl nakin a biapi deuh lo maw? Cun pum zong hi hnipuan nakin a biapi deuh lo maw?” a ti. Bawi Jesuh nih taksa caah ti le rawl hi a herh lo a ti lo; cu ti le rawl nakin nunnak a biapi deuh tiah a kan cawnpiak.

Pathian le Moses an pahnih in chimmi hi Thlarau nunnak kong lei hoih in an chim. Taksa diriamnak le herhnak menmen nih cun nunnak ngaingai a phakpi kho lo. Taksa lawng kan ngei lo, thlarau zong kan ngei ti kha a kan hngalhter fawn. Pathian nih minung a kan ser tikah pum he thlarau he a kan ser. Pum loin a tlinlo bantukin thlarau loin a tling fawn lo. Cucaah minung tling sinak dingah pum he thlarau he ngeih a hau. Cucaah cu pum le thlarau cu a pahnih in zohkhenh le dawt kan hau.

Cheukhat cu taksa i cawmnak le rian hmuhnak caah cun zeipoah kan ngamh, tangka zong kan siang, khawika paoh ah kal le i tthial zong kan ngamh; cun mi tang vaa dor zong khi kan ti kho ngai; asinain Thlarau caah siaherhnak kan ngeih le tuaktan a tlawm ngai in ka hmuh. Bible rel, thlacam le pumh ti bantuk ah kan ttang lo; i biataknak kan ngei lo. “Kannih chung hi thlarau lei in kan der tuk i, thla rak kan campiak uh” tiah thlacam cah cu a tam ngai. Asinain thlarau hmuhnak le zumh khawhnak dingah mah pumpak in Bible rel, pumhnak ah kal, thlacam ti bantuk khi kan tenh ti lo, siaherhnak kan ngei ti lo.

Unau, Pathian nih kan pumsa caah taksa tirawl a kan pek bantukin thlarau rawl zong a kan pek ve. Cucaah “Minung hi rawl lawnglawng in nunnak a si lo” a ti tikah hin a fiang ngaimi cu taksa nih a herhmi tirawl lawng kha nunnak a si lo, Pathian kaa in a chuakmi tu hi nunnak hrampi cu a si” ti hi a si. Kawl phungthluk nih cun “Pawkhim lawngah pathian biak khawh a si lai” ti a si. Rawl ttam ahcun, pathian biak khawh lo khi a lo cang. Kannih kan Pathian cu ti le rawl a pinlei ah nunnak a um rih; rawl lawnglawng in a nung lo; Pathian kaa in a chuakmi tu kha nunnak a si. Pathian cu kan nunnak hrampi, nun cawmtu a si kha Cathiang nih a kan cawnpiak.

Pathian cu kan dihlak nun cawmtu si zungzal ko seh!..Amen.