Vawlei Teitu Jesuh

CIM Zarhpi Ni Caan Hmannak (June 5, 2011)

Caan tlaitu: Hrang Hlei (St. Paul, MN, USA)

Thawngtha chimtu: Rev. Thawng Hlei Thang (Assistant Lecturer, MIT, Insein)

Rev. Thawng Hlei Thang hi a chuahnak cu Khuahlun, Hakha a si. Falam Baibal sianginn (ZTC) in BTh degree a hmuh hnu ah Hakha Baptist Church ah caan zeimaw zat chung pastor rian a tuan. Cu hnu ah, MIT, Insein in MDiv degree zong a hmuh. MIT nih ca chimh rian tuan ding in an auh ca ah a nupi le a fapa he MIT ah Pastoral Theology lei he pehtlai in Assistant Lecturer a tuan lio mi a si. Nihin thawngtha a kan chimh khawh ca ah a cung ah lung lawmhnak nganpi kan ngei. Hmailei Bawipa rian a tuan nak ah Bawipa lila nih a lam tluanter ko seh.

Vawlei Teitu Jesuh

31Jesuh nih cun, “Atu cu nan ka zumh cang. 32Asinain nan dihlak in ṭhek nan si i nanmahle nan inn cio ah nan kal i keimah lawngte nan ka nganh lai caan kha a ra lio i atu hi a phan cang. Sihmanhsehlaw keimah lawng ngaingai cu ka si lo, zeicahtiah ka Pa nih a ka umpi ko. 33Nannih nih keimah he nan i pehnak thawngin lungdaihnak nan hmuh nakhnga, hihi kan chimh hna. Vawlei nih hin harnak an pek hna lai, sihmanhsehlaw tih hlah u. Vawlei cu ka tei cang,” tiah a ti (John 16: 31-33).

Minung thongtampi hmai ah Jesuh cu an thut ter i a phunphun in an nih sawh, an cil hna an chak, an bengh i an duh poh in an tuah. Asinain cupkhap ti loin dai tein a in ko. “Biakinn cu na thehdih i ni thum chung ah na sak dih than taktak ko” an ti. Hi lio caan ah hin sualnak a ngei lomi Jesuh nak khan mithat lainawngpa, mi thah ruang i thong i an thlak mi pa kha an duh deuh. Jesuh kha vailam ah khenh u law Barnabas kha kan thlak piak u tiah an au.

Jesuh nih hin a inntuar lai nak kong kha fiang tein voithum kheng te a rak chimh cang ko hna nain an rak theithiam lo. Misual mi hna kutchung i an vun chanh tikah cun a hohmenh nih a pawng ah an um hnawh ngam lo. Nangmah caah cun thih zong ka ngamh ko tiah a ti tu Peter hmenh nih khan Jesuh cu ka theibak lo tiah a rak ti. Hlanlio Rome ralkap hna mi hrem le mi thah ning hi tih a rak nung ngai ko rua, a ho te nih a pawng in an rak zul ngam lo. Vailam tung kha an putter; sawnruangmang i a kal hmenh ah khan changtu an rak um lo. Sairin khua pa Simon tu nih khan a rak chan. Awnau lo tein dai tein a in ko. Prophet Isaiah nih, "Thah awk ah an kal pi mi tuufa bantuk, a hmul meh awk ah an hruaih mi tuu bantuk in awnau lo tein a um....thahawk ah an kal pi, zei ti a va um te lai ding kha a hohmenh an zei a poi lo" a rak ti.

Zultu hna kha Jesuh an hun tlaih taktak tik le an hun thah tikah cun an lung a dong tuk i an rianthing ah kir than an i tim. An ruahchannak kha a tlau, an hnabei a dong cikcek ko. A sinain zerhpi zing i a leng mi thawng nih khan an thin lung kha a thawnter, an zumhnak kha a fehter than, ruahchannak kha an hun ngei than. Cu nih cun Jesuh ca i thihngamhnak taktak kha a hun chuah pi. Jesuh thah nak khua a rak khang tu hna lakah hin Biaknak lei i hruaitu kan ti mi hna Tlangbawi ngan hna le Phungbia cawnpiak tu hna hi fak ngai i a tang mi cu an rak si. Jesuh cu dinfel nak in siseh nunning in siseh cawnpiaknak lei in siseh an rak tih tuk mi a si ca ah hriamnam lei tu in doh le thah an rak timh. Kan tei cang tiah an rak ruah nain Jesuh cu an rak tei lo.

Vawlei tuan bia ah vawlei pi tei a rak i zuam mi hna France (Pintit) ralbawi Napoleon zong vawlei pi tei i uk a rak i tim nain a rak tei kho lo. A raltuk nak tu ah sualnak ngei lo minung sing 500000-700000 kar an thi. Adonghnak ah cun a mah zong a thi beh. Japan le German pawl zong nih vawlei cu tei an rak i tim nain an rak tei lo. Hiroshima le Nagasaki minung le Jews pawl tam tuk an rak thah hna.

Jesuh tu nih cun vawlei hi dinnak in a rak tei. Jesuh tu nih cun vawlei hi toidawrnak in a rak tei. Jesuh tu nih cun vawlei hi nunnak in a rak tei. Hla phuah tu nih "Thihnak teitu minthang khamhbawi na hmai hmuh ka duh ko" a ti bantuk in thihnak tei tu taktak cu Jesuh lawnglawng a si. Thawhthannak nih Ruahchannak a kan pek, kan zumhnak hrampi zong a si.

Jesuh nih a zultu hna kha, vawlei nih hin harnak tampi an pek hna lai, sihmanhsehlaw tih hlah u. Vawlei cu ka tei cang a ti. Vawlei tei tu Jesuh thawng in kan nih zong tei tu kan si ve. Kan nun chung ah vawlei nih a chuah pi mi harnak phunphun, ngaihchiatnak phunphun kan tong ko lai, kan lung dong hlah u si. Vawlei a tei tu kan si kha philh hlah u sih.

Pathian nih thluachuahnak in pe ko hna seh. Amen.

Pa Hlei

Camp/Flemington, NJ, USA