Kan Lungretheihnak Pathian Sinah Phuang Hna Usih

CIM Zarhpi Ni Caan Hmannak (May 1, 2011)

Caan tlaitu: Hrang Hlei, St. Paul, MN, USA

Thawngtha chimtu: Umnai Kui, Hong Kong

Twin cities (St. Paul, MN, USA) in nan kut kan tlaih hna! Nihin thawngtha a kan chimtu hi Umnai Kui a si. Laitlang a chuahnak khua cu Khang Yang, Kanpetlet peng, a si. A ngak chiat te in Hakha ah a um i a thang mi a si. Nupi a ngei i fapa pakhat a ngei. A tu lio hi Divinity School of Chung Chi College, Hong Kong, ah M.Th program a kai lio a si. Thesis a tial cuahmah lio a si i a rauh hlan ah a dih lai. Chin Christian College (CCC), Hakha, in B.Th. degree le Myanmar Institute of Theology (MIT), Insein, in M.Div. degree tlamting tein a lak hnu ah, Asho Chin Theological Seminary, Pyay, Pego Division, ah cachim rian a tuan. Cu ka i cachim rian a tuan bu in a tu hi Hong Kong ah ca cawn ah a ra mi a si. Nihin thawngtha chim awk ah caan a kan pek ca ah a cungah kan i lawm.

Thlacam ding:

1. Kawlram le vawlei khuaza ah a um i a phunphun ruangah retheihnak, ngaihchiatnak, harnak, le hremnak a tuar mi hna ca ah thla cam hna usih.
2. Damlonak a phunphun ruangah rethei le lung dong in a um mi kan unau, hawikom hna ca ah thla cam hna usih.
3. Ram chung/leng um mi Laimi khrihfabu kip nih khamhnak thawngtha cu zumhtlak le ral tha in kan i nunpi khawh cio nakhnga thla cam hna usih.

Thawngtha kan ngeih hlan ah, Hniang Hniang sak mi "Bawipa na ka Dawtnak" hla ngai hmasa hna usih.

Kan Lungretheihnak Pathian Sinah Phuang Hna Usih

1999 kum March thla chung ah, Chin Christian College (C.C.C.) min in Senthang peng ah kan kal. Kan i tinhmi cu thawngtha chim lawng si lo in, C. C. C. caah bawmhnak hal pah zong a si. Khua pakhat kan phan. Zingka teah ka tho I, Khrihfa upa pakhat he innkip ah thlacam ding ah kan kal. Inn pakhat ah ka tonmi cu a tanglei bantuk hin a si.

“Lam hlatnawn khin, inn cu ka hun zoh. Inn chung ka luh hlan ah zeiban tuk chungkhar an umnak inn dah a si hnga tiah ka lung chung in bia ka hal. Innka ka vun phat khin, inn chung lei cu ka vun zoh i, nu pakhat (kum 50-55) hrawng a simi le ngakchia pathum (kum 15-20) kar hrawng a si dingmi hna cu ka hmuh hna. Keimah le keimah bia ka halmi cu, “an pa tah a um hnga lo maw?” ti mi hi a si. Hngachia pakhat cu tatpi chak ah a thu i, hehehehehehehe tiah a hun ni. A hmai in a ke tiang, tatpi vutcam in a khat ko. Ka lung chung ah “ziah mah hi” ka ti. A dang pakhat cu bawngbi lo pi in a um. A orhlei ban a ka ah a hmawm pah bu in, a mitsen nawn in a ka zoh. A ban in a rung luangmi a cilkadi cu a kutdong le zeltuang ah duhsah tein a vung tla. Ka lung chung ah cun, “mah cu dah ngai” ka ti. A pathumnak pa cu ka hei zoh than. A mah cu inn leng lei chuak ding phun khin, zuri kal in duh sah tein a kal.”

Inn ngeitu nu hi, a fa le pathum ning in tlamtlinglomi an si. Fapa pathum a ngeih hna i, pathum ning te in a tlaamtlinglomi an si tikah, mah minu hi zeitluk indah a lungre a theih lai; zeitluk kum sau dah Pathian sin ah thla a cam cang lai; Pastor pazeizah ko dah a fa le damnak ding caah tlacam a kawh cang hna lai; Pastor pazeizah ko nih dah thla an campiak cang hna lai; thawhlawm zong a mah tikhawh tawk tein zeizah ko dah a pek cang lai. Asinain a fa le cu an mah ning te an si ko.

Cheu khat nih zeithil kan ton pauh ah Pathian sinah lawmhnak kan chimding a si an ti. Mah minu nih hin Pathian sinah lawmhnak chim a harh ko lai. A fa le tlamtlinglo an sinak ruang ah hin, pathian cu a thangthat kho theng lai lo. Mah minu nih hin Pathian thangthatnak in, Pathian sinah a ngaihchiatnak le a retheihnak chim phuan tu hi a tuah khawh deuh lai. Zei ruang ahdah ti asi ah cun, a lungthin vialte cu ngaihchiatnak in a khah caah a si. A lunthin chung ah lawmhnak a um lo mi nih cun lunglawmhnak cu zeitin dah an chim khawh lai. Lawmhnak a tongmi nih lunglawmhnak, retheihnak a tongmi hna nih kan retheihnak Pathian sinah kan phuan ding a si.

Lazaruh a thih ruangah Martha le Mary cu an mitthli he an i ciah. Cu lio ah cun Bawi Jesuh an sinah a va phan. Jesuh sin ah cun an lungretheihnak hi ti hin an phuan, “Nangmah tuante ah phan law cu kan ta a thi hnga lo.” Bawi Jesuh zong a tap (Johan 11: 17-23; 32-37). Kan Pathian hi re a theimi hna re a kan theih pi tu le a ngaihchiami hna a ngaih an kan chiatpi tu a si. Kan lungretheihnak Pathian sin ah phuang hna u sih.

Nihin thawngtha a hrawm mi kan dihlak cung ah kan Bawipa vel le thluachuah um ko seh. Hmaizerh thawngtha a kan chim tu ding cu Union Theologiccal Seminary, New York, ah S.T.M a kai cuahmah mi kan hawi San Lian a si. A thawngtha ngaih awk ah thlacam bu in rak hngak cio usih.