Na Inn Ah Va Tlung

CIM Zarhpi Ni Caan Hmannak (March 13, 2011)

Caan tlaitu:  Biak Tha Hnem

Thawngtha chimtu: Rev. Dr. Lal Uk (TABC GS)

Pathian dawtnak thawng in nihin Bawipa Thawhthan zingah a mah thawngtha i hrawm ti kho ding in caantha caan sunglawi kan hmuh khawh caah Sertu Pathian kan thangthat ko. Salm catialtu pa nih cun fung 103 nak ah hiti hin a ti:

Maw ka nunnak, Bawipa cuthangṭhat tuah! Ka sining vialte, a min thiang cu thangṭhat tuah u! Maw ka nunnak, Bawipa cu thangṭhat law zeitluk in dah zaangfahnak a ngeih kha philh hlah.Ka sualnak vialte kha a ka ngaihthiam i ka zawtnak vialte kha a ka damter;thlan chungin a ka khamh i dawtnak le zaangfahnak he thluachuah a ka pek.

Tuzing ah thlacam piak cio ding in sawm kan duh mi hna cu;

1. Japan ram ah lihninh nak ruangah harsat nak a tongcuah mah mi hna caah le kan miphun an ram a ummi hna caah.
2. Kan miphun hawi Malaysia ummi si hna seh, India lei a ummi hna si hna seh himnak an hmuh khawh nak hnga.
3. Kawlram chung ummi hna nih cozah tha le zalonnak an hmuh khawh nak hnga.
4. Laimi hi kan umnak cio ah Bawipa sunpar nak a langh ter kho tu kan si cio khawh nak hnga.

Tuzing caan ah thawngtha bia chim ding in kan sawmmi cu Rev. Dr. Lal Uk a si. Kan sawm bantuk tein a rian tampi lak ah a kan tenh i a tu a sermon zong hi khual tlawn lam in a rak kan kuat mi a si. A cungah kan i lawm tuk hringhren. A mah hi a chuahnak khua cu Thantlang peng Fungkah khua a si nain Thantlang deuh ah a thangmi le khua a sa mi an si. A sianginn kainak le a riantuan mi kong he peh tlai in 1997 ah MIT in BD a dih i Johnson Memorial Baptist Church, Thantlang ah Church pastor a tuan. 2001 in 2004 tiang Philippines ah sianginn a kai than i Asian Theological Seminary (ATS) in M A le Manila Theological College in D.Min a dih. 2007 in nihin tiang TABC General Secretary rian a tuan lio a si. A nupi cu Pi Thla Dim a si i fanu pakhat le fapa pahnih an ngeih hna. Dawtnak in hawikom nih cun Mercy pa tiah kawh khawh a si. A cungah kan i lawm tuk hringhren. Pathian nih hmailei zongah thukchin le kauchin in kan ram le miphun caah hmang hram ko seh. A tu cu a mah nih caan a hmanak a si rih lai.

NA INN AH VA TLUNG

Bible cangthim;

"Khuachia nih an chuahtak cang mipa nih khan Jesuh cu a nawl i, "Na sinah kal ve ko ning," a ti. Sihmanhsehlaw Jesuh nih a donh i,"Inn ah va tlung law Pathian nih na caah a tuahmi tu kha va chim hna," tiah a ti. Mipa cu khuachungah khan aa chawk i a caah Jesuh nih a tuah mi kha a chimh hna (Luka 8:38- 39).

A sinain Thiang Thlarau nan cung i a tlun tik ahcun, thawnnak in nan khat lai i Jerusalem khua le Judea ram vialte le Samaria ram ah le vawlei cung khuazakip ah ka tehte nan si lai," tiah a ti hna (Lamkaltu 1:8).

Dawtmi nu le pa, u le nau vialte hna, tuzing caan ahhin, "NA INN AH VA TLUNG" timi tlangtaar in Pathian bia tawite i hrawmti hna usih tiah kan sawm hna. Hi bia hi kan Bawipa Jesuh Khrih bia si. Amah a rak tong tupa - a chungah khuachia nih a rak luhhnawh mipa - caan saupi innah um duh lo in mithi vuinak lungkua ah a um mipa sin ah a chim mi bia a si. Bawi Jesuh le hi mipa an i tonnak kong in a tanglei i ka van langhter mi hna hi ruatti hna usih tiah kan sawm hna.

1. Bawi Jesuh Khrih nih, "Na inn ah va tlung" a timi pa hi a mah a rak tongtu pa si. Cucaah inn ah kan tlung lai kan titik ahhin Jesuh Khrih a tong hmasa mi kan si hi a biapi tuk hringhran. Jesuh Khrih he ai tong inn ah a tlungmi nun cu nun hlun in nun thar ah ai thleng mi (2 Kor 5:17) nun a si.

2. Mipa hi Jesuh Khrih he an i ton tik ah a zawtnak (khuachia temtawnnak) in a dam i cuhnu ahcun Jesuh nih na inn ah va tlung a timi a si. Kan inn kan tlung lai kan titik ahhin taksa, thinlung, thlarau le zumhnak in a dam mi kan si hi a biapituk fawn. Nihin ah mi cheukhat cu damte in innah tlun cu chimlo, zawtnak thalo AIDS ti bantuk hna he inn ah a tlungmi tampi um a si cang i ngaihchia ngaingai a si cang. Khuachia khuavang, hnamrung le thilchia zumhnak a phunphun he inn ah a tlung mi zumtu kan tamtuk rih fawn i cu hrimhrim cu nihin laimi khrihfa kan zumhnak a ngan a damlonak nganpi pakhat a si rih caah ngaihchiat awk ngai a si rih.

3. Jesuh nih, "Na inn ah va tlung" a timi pa hi inn um duh lo in mithi lungkua ah a um mipa a si. Nihin ahhin kan pumpak cio in i chek than hna hmanh usih, kan umnak ding a simi kan inn cio ahhin kan um taktak hna maw? Inn um duh lomi vialte sin ah Jesuh fialnak bia a si caah al awk tha a silo, kan tlun hrimhrim cu a hau ko lai.

4. Bawi Jesuh nih "Na inn ah va tlung" a timi inn hi a chim duh bik mi cu chungkhar a si. Zeicaahtiah inn chungkhar cu minung bu ai thoknak a si. Biaknak (biakinn) ai thoknak a si. Cawnak sianginn ai thoknak a si. I hruainak (cozah) ai thoknak a si. Damnak siizung thabik ai thoknak a si. Vanram (Pathian pennak) ai thoknak a si. Cucaah Pathian zong nih a khamhnak hi chungkhar in a phuan tawn (Gen. 7:1; Lk.19:9).

5. Inn i kan tlunnak ahhin a biapi tuk mi cu kan zulh mi lam hi a si i cu lam cu Jesuh Khrih lam lawnglawng hi a si (Jn. 14:6).

6. Inn tlun hi a biapit tuk caah Jesuh Khrih nih a kan fial cu a si. Hei ruah rih a hau mi cu inn i a tlungtu a biapit tlukte in inn hngaktu lungput le dirhmun hi a biapi hringhran. Cucu fapa tlaupa le a upa hmaanthlak in hmuh khawh a si.

7. Kan inn ahcun tlung hmasa hna usih law -- kan inn in i thawh than hna usih. Bawi Jesuh fial bantuk in inn tlun hmasat cu a biapi taktak ko. Sihmanhsehlaw inn chung i ai erh peng mi kan silo ding cu a biapi tuk ve. Mipa kha inn i a tlun tik ah inn chung ah ai erh peng lo. Khuachung (khuahra peng) ah khan ai chok i a caah Jesuh nih a tuah mi kong kha a chimh hna. Mah hihi Lamkaltu 1:8 ah Bawi Jesuh nih a kan cawnpiak duh mi zong a si kha a fiang ngaingai.

Cucaah Bawi Jesuh nih a kan fial bantuk in kan innchungkhar (inn) ah tlung cio hna usih. Kan inn a simi kan khrihfabu ah tlung hna usih. Kan innpi a simi Lairam le Laimi phun inn ah tlung hna usih. Jesauh Khrih khamhnak thawngtha hi kan lairam fingtlang horkuang thingkung ramsa zong an theih i an cotin khawhnak hnga chim hna usih. Kan vawlei a simi kan innpi ah tlung hna usih law Pathian pennak cu vawlei ah tlunter hna usih. Cu Pathian pennak vawlei cun zungzal kan inn a simi kan pa Pathian inn ahcun tlung cio hna usih tiah kan sawm hna. Thawngtha ai hrawm mi vialte cungah Pathian nih thluachuahnak in pe ko hna seh.